गडचिरोली, दि. 30 सप्टेंबर : आगामी दिवाळी सणाच्या पार्श्वभूमीवर गडचिरोली जिल्ह्यातील इच्छुक नागरिकांना तात्पुरत्या फटाका साठवणूक व विक्री परवान्यासाठी अर्ज करण्याचे आवाहन करण्यात आले आहे. या परवान्याची मुदत पंधरा दिवसांची असून, अर्जदारांनी दिनांक 10 ऑक्टोबर 2025 पूर्वी जिल्हादंडाधिकारी, गडचिरोली यांच्या कार्यालयात विहीत नमुन्यातील अर्ज सादर करणे बंधनकारक आहे. मुदत संपल्यानंतर प्राप्त होणारे अर्ज ग्राह्य धरले जाणार नाहीत. जिल्ह्यातील सर्व तात्पुरते परवानाधारकांनी देखील नव्याने अर्ज करणे आवश्यक आहे.
संबंधित तहसिलदार तसेच नगर परिषद, नगर पंचायत किंवा ग्रामपंचायत यांनी अर्जदारांच्या विनंतीनुसार नियोजित जागेची सुरक्षिततेच्या दृष्टीने तपासणी करून नाहकरत प्रमाणपत्र देणे आवश्यक आहे. तसेच पोलीस अधीक्षक, गडचिरोली यांनी नियमांनुसार अर्जदारास चारित्र्य प्रमाणपत्र निर्गमित करणे गरजेचे आहे.
अर्जासोबत खालील कागदपत्रे जोडणे अनिवार्य राहील :
पोलीस अधीक्षक कार्यालयाचे चारित्र्य प्रमाणपत्र
तहसिलदार कार्यालयाचा अहवाल
स्थानिक स्वराज्य संस्थेचे नाहकरत प्रमाणपत्र
नियोजित जागेचा अभिलेख
अर्जदाराचे आधारकार्ड
दोन पासपोर्ट आकाराचे फोटो
इमारत/जागा स्वतःची नसल्यास घरमालकाचे संमतीपत्र
Explosive Rules, 2008 नुसार फटाक्यांचे दुकान अग्नीप्रतिरोधक साहित्यापासून बांधलेले, बंदिस्त व सुरक्षित असावे. दुकाने परस्परांपासून किमान 3 मीटर अंतरावर आणि संरक्षित क्षेत्रापासून किमान 50 मीटर अंतरावर असणे बंधनकारक आहे. दुकाने समोरासमोर नसावीत. दुकान परिसरात तेल, गॅस किंवा खुल्या दिव्यांचा वापर करता येणार नाही; मात्र भिंतीला किंवा छताला बसविलेले विद्युत दिवे वापरता येतील. उघड्या स्वरूपातील विद्युत तारा नसाव्यात. प्रत्येक दुकानाला स्वतंत्र विद्युत स्विच तसेच सर्व दुकानांसाठी एक मास्टर स्विच असणे आवश्यक आहे.
दुकानाच्या 50 मीटर परिसरात आतिषबाजीवर बंदी राहील. तसेच एका ठिकाणी 50 पेक्षा जास्त फटाक्यांची दुकाने उभारण्यास परवानगी दिली जाणार नाही.
अर्जदारांनी सर्व कागदपत्रे आणि अटींची पूर्तता करून दिलेल्या मुदतीत अर्ज दाखल करावेत, असे आवाहन अतिरिक्त जिल्हादंडाधिकारी श्री. सुनील सूर्यवंशी यांनी केले आहे.
