गडचिरोली : महिलांचे आरोग्य हे संपूर्ण कुटुंब व समाजाच्या आरोग्याशी थेट निगडित आहे. याच पार्श्वभूमीवर केंद्र व राज्य शासनाच्या मार्गदर्शनाखाली १७ सप्टेंबर ते २ ऑक्टोबर २०२५ या कालावधीत ‘स्वस्थ नारी, सशक्त परिवार’ हे विशेष अभियान राबविण्यात येणार आहे.
या कालावधीत जिल्ह्यातील आयुष्मान आरोग्य मंदिरे, प्राथमिक आरोग्य केंद्रे, ग्रामीण रुग्णालये आणि जिल्हा रुग्णालय येथे महिलांसाठी आरोग्य शिबिरे आयोजित केली जातील.
या शिबिरांमध्ये महिलांना प्रतिबंधात्मक, आरोग्यवर्धक व उपचारात्मक सेवा एकाच ठिकाणी उपलब्ध होणार आहेत. यामध्ये उच्च रक्तदाब, मधुमेह, स्तन व गर्भाशय मुखाचा कर्करोग, तोंडाचा कर्करोग यांसारख्या असंसर्गजन्य रोगांची तपासणी केली जाईल. तसेच रक्तक्षय (ॲनिमिया), क्षयरोग, सिकल सेल तपासणी, गर्भवती महिलांची प्रसूतीपूर्व काळजी (ANC), माता व बाल संरक्षण कार्ड वाटप आणि लसीकरण अशा सेवा पुरविल्या जातील, असे जिल्हा आरोग्य अधिकारी डॉ. प्रताप शिंदे यांनी सांगितले.
शिबिरांत महिलांसाठी पोषण, मासिक पाळीची स्वच्छता आणि निरोगी जीवनशैली यावरील मार्गदर्शन सत्रांचे आयोजन करण्यात येणार आहे. याशिवाय रक्तदान शिबिरे, मानसिक आरोग्य समुपदेशन, तसेच आयुष्मान भारत, ABHA कार्ड व प्रधानमंत्री जनआरोग्य योजना (PM-JAY) यांसाठी नोंदणी व मदत डेस्क उपलब्ध राहील.
शिबिरांच्या आयोजनात लोकप्रतिनिधींचा सक्रिय सहभाग असेल. प्रत्येक महिलेला या अभियानाची माहिती मिळावी यासाठी घराघरात जाऊन तसेच सोशल मीडियाच्या माध्यमातून जनजागृती केली जाणार असल्याचे जिल्हा शल्यचिकित्सक डॉ. माधुरी किलनाके यांनी सांगितले.
दि. १२ सप्टेंबर रोजी मुख्य कार्यकारी अधिकारी जिल्हा परिषद गडचिरोली श्री. सुहास गाडे यांच्या मार्गदर्शनाखाली झालेल्या जिल्हा कृती दलाच्या बैठकीत या अभियानाच्या यशस्वी अंमलबजावणीसाठी मार्गदर्शक सूचना देण्यात आल्या. यावेळी जिल्हा माता-बाल संगोपन अधिकारी डॉ. प्रफुल्ल हुलके तसेच जिल्हास्तरीय अधिकारी उपस्थित होते. नोडल अधिकारी डॉ. स्मिता साळवे व डॉ. प्रेरणा देवतळे यांनी शिबिराचे नियोजन केले आहे.
हे अभियान केवळ आरोग्य तपासणीपुरते मर्यादित नसून महिलांना त्यांच्या आरोग्याविषयी सजग करून त्यांना सशक्त बनविण्याचे एक महत्त्वाचे साधन ठरणार आहे, असे जिल्हाधिकारी अविश्यांत पंडा यांनी सांगितले. तसेच सर्व महिलांनी या अभियानांतर्गत आपल्या आरोग्याची तपासणी करून घ्यावी, असे आवाहनही त्यांनी केले.
