कुरखेडा | गडचिरोली जिल्हा (महाराष्ट्र)
गडचिरोली जिल्ह्यात दारूबंदी लागू असतानाही अवैध दारू तस्करीचा मोठा जाळा कार्यरत असल्याचे आरोप स्थानिक पातळीवर जोर धरत आहेत. केसोरी (जि. गोंदिया) येथून कुरखेडा येथे मोठ्या प्रमाणात दारूची अवैध वाहतूक होत असल्याची चर्चा असून, या संपूर्ण प्रकरणामागे एका कथित बार मालकाचा हात असल्याचे सांगितले जात आहे. मात्र, या सर्व आरोपांची अधिकृत पुष्टी अद्याप झालेली नाही.
होळीपूर्वी ‘सहा महिन्यांचा कोटा’ तीन दिवसांत?
होळी सणाच्या पार्श्वभूमीवर दारूची मागणी वाढल्याने तस्करीही वाढल्याची चर्चा आहे. सूत्रांच्या माहितीनुसार, अवघ्या तीन दिवसांत सहा महिन्यांच्या कोट्याएवढी दारू पुरवठा झाल्याचे बोलले जात आहे. दररोज संध्याकाळच्या सुमारास एसयूव्ही, पिकअप, ट्रक आदी वाहनांतून दारूची खेप कुरखेड्याकडे आणली जात असल्याचे स्थानिकांचे म्हणणे आहे.
काही वाहनांमध्ये देशी-विदेशी दारू मोठ्या प्रमाणावर आणली जात असल्याचा दावा केला जातो. या वाहनांची ये-जा नियमित असल्याचेही सांगितले जाते.
पोलिस संरक्षणाचे आरोप; अधिकृत प्रतिक्रिया नाही…
या प्रकरणात संबंधितांना विभागीय संरक्षण मिळत असल्याचा आरोप नागरिकांकडून केला जात आहे. “गाडी माझी आहे, काही होणार नाही” अशा प्रकारची उघड वक्तव्ये केल्याचीही चर्चा आहे. मात्र, पोलिस विभागाकडून यावर कोणतीही अधिकृत प्रतिक्रिया देण्यात आलेली नाही.
तसेच, इतर कोणी दारू तस्करीचा प्रयत्न केल्यास त्यांच्यावर कारवाई करून पकडवले जाते, अशीही चर्चा आहे. काही दिवसांपूर्वी कुरखेडा-चिकली मार्गावर अशी घटना घडल्याचे सांगितले जाते; तथापि यालाही अधिकृत दुजोरा मिळालेला नाही.
‘ओरिजिनल’ लेबलखाली डुप्लिकेट दारू?
सर्वात गंभीर आरोप म्हणजे ओरिजिनलसारखे लेबल लावून डुप्लिकेट दारू विक्री केली जात असल्याचा आहे. नव्या ब्रँडच्या नावाखाली बनावट दारू विकून कोट्यवधींची कमाई केली जात असल्याची चर्चा आहे. काहींच्या म्हणण्यानुसार, अशा दारूमुळे आरोग्यावर गंभीर परिणाम होत असून काही मृत्यू झाल्याच्याही अफवा पसरल्या आहेत. मात्र, यासंदर्भात कोणतीही अधिकृत नोंद किंवा पुष्टी उपलब्ध नाही.
युवकांमध्ये दारूचे व्यसन वाढत असल्याची चिंता व्यक्त केली जात आहे. विशेषतः देशी दारू आणि नव्या लेबलखाली विकल्या जाणाऱ्या मद्याबाबत शंका उपस्थित केल्या जात आहेत.
सट्टा आणि इतर अवैध धंद्यांचीही चर्चा…
कुरखेडा नगरपंचायत हद्दीत दारूसोबतच सट्टा यांसारखे अवैध धंदेही सुरू असल्याचे बोलले जाते. साप्ताहिक बाजार परिसरात काही बेकायदेशीर व्यवहार उघडपणे सुरू असल्याची चर्चा आहे. नागरिकांमध्ये “तक्रारी असूनही कारवाई का होत नाही?” असा सवाल उपस्थित केला जात आहे.
सतत वाढणाऱ्या आरोपांच्या पार्श्वभूमीवर नागरिकांकडून संपूर्ण प्रकरणाची उच्चस्तरीय आणि निष्पक्ष चौकशी करण्याची मागणी होत आहे. जर खरोखरच कोट्यवधी रुपयांची अवैध दारू तस्करी सुरू असेल, तर संबंधितांवर कठोर कारवाई व्हावी, अशी अपेक्षा व्यक्त केली जात आहे.
दरम्यान, या सर्व प्रकरणात पोलिस व प्रशासनाची अधिकृत भूमिका काय असेल, याकडे जिल्ह्याचे लक्ष लागले आहे. आरोप सिद्ध झाल्यास हे प्रकरण कायदा-सुव्यवस्थेसह सार्वजनिक आरोग्यासाठीही गंभीर ठरू शकते.
