चामोर्शी :
तालुक्याचे मुख्य ठिकाण असलेल्या चामोर्शी शहरात वाढत्या अतिक्रमणामुळे वाहतूक कोंडीची समस्या दिवसेंदिवस गंभीर बनत आहे. ग्रामीण भागातून मोठ्या प्रमाणात नागरिक येथे ये-जा करत असताना, मुख्य मार्गांवरील अतिक्रमणामुळे शहरातील वाहतूक व्यवस्था पूर्णपणे विस्कळीत झाली आहे. विशेषतः गुरुवारी भरत असलेल्या आठवडी बाजाराच्या दिवशी परिस्थिती अधिकच चिंताजनक बनते.
मुख्य रस्ते अतिक्रमणाच्या विळख्यात…
शहरातील प्रमुख मार्गांवर दुकानदारांनी शेड, फलक, बोर्ड तसेच विविध साहित्य ठेवून उघडपणे अतिक्रमण केले आहे. काही ठिकाणी नाल्याबाहेरपर्यंत सामान मांडण्यात आल्यामुळे रस्ते अत्यंत अरुंद झाले आहेत.
तहसील कार्यालय, पंचायत समिती आणि कृषी उत्पन्न बाजार समिती यांसारखी महत्त्वाची शासकीय कार्यालये या भागात असल्याने दिवसभर मोठी वर्दळ असते. त्यामुळे अतिक्रमणामुळे निर्माण झालेली वाहतूक कोंडी अधिकच तीव्र होत आहे.
नगरपालिकेचे दुर्लक्ष उघड…
या गंभीर समस्येकडे स्थानिक नगरपालिकेचे स्पष्ट दुर्लक्ष होत असल्याचा आरोप नागरिकांकडून केला जात आहे. वारंवार तक्रारी करूनही अतिक्रमण हटविण्यासाठी कोणतीही ठोस मोहीम राबविण्यात आलेली नाही. परिणामी, अतिक्रमण दिवसेंदिवस वाढत असून शहरातील वाहतूक व्यवस्थेवर त्याचा मोठा परिणाम होत आहे.
पादचारी, विद्यार्थी आणि रुग्णांसाठी धोकादायक परिस्थिती…
अतिक्रमण आणि वाहतूक कोंडीमुळे पादचारी, विद्यार्थी, महिला तसेच रुग्णवाहिकांना मार्ग काढताना मोठ्या अडचणींचा सामना करावा लागत आहे. अनेकदा नागरिकांना जीव धोक्यात घालून प्रवास करावा लागत असल्याचे दिसून येत आहे.
आठवडी बाजाराच्या दिवशी परिस्थिती भयावह…
गुरुवारी भरत असलेल्या आठवडी बाजारामुळे या मार्गावर जड वाहनांची वाहतूक सुरूच असते. त्यामुळे वाहतूक कोंडीची समस्या अधिकच तीव्र होत असून, अपघाताचा धोका वाढत आहे.
काँग्रेसचे सोशल मीडिया प्रमुख विजय लाड यांनी प्रशासनाला इशारा देत गुरुवारी या मार्गावर जड वाहनांना तात्काळ बंदी घालावी, तसेच शहरातील सर्व अतिक्रमण त्वरित हटवावे, अशी मागणी केली आहे.
अन्यथा नागरिकांच्या सुरक्षेसाठी लवकरच तीव्र आंदोलन, रास्ता रोको आणि प्रशासकीय कार्यालयांवर घेराव घालण्यात येईल, असा स्पष्ट इशारा त्यांनी दिला आहे.
चामोर्शीतील अतिक्रमण आणि वाहतूक कोंडीच्या समस्येमुळे नागरिक त्रस्त झाले असून, नगरपालिकेने तातडीने ठोस पावले उचलणे गरजेचे आहे. अन्यथा मोठ्या अपघाताची शक्यता नाकारता येत नाही.
