गडचिरोली | प्रतिनिधी
गोंडवाना विद्यापीठ, गडचिरोली येथील परीक्षा व मूल्यमापन मंडळाचे संचालक डॉ. प्रवीण पोटदुखे यांचा गोंडवाना विद्यापीठ कर्मचारी संघटनेच्या वतीने शाल, श्रीफळ व पुष्पगुच्छ देऊन भावपूर्ण सत्कार करण्यात आला. त्यांच्या उल्लेखनीय व आदर्श कार्याची दखल घेत हा सन्मान करण्यात आला.
डॉ. पोटदुखे यांनी परीक्षा व मूल्यमापन मंडळाचे संचालक म्हणून जवळपास दीड वर्षांचा यशस्वी कार्यकाळ पूर्ण केला. विद्यापीठाच्या नियमांनुसार वयाची ५८ वर्षे पूर्ण झाल्यामुळे त्यांना कार्यमुक्त करण्यात आले. आपल्या कार्यकाळात त्यांनी अत्यंत प्रामाणिकपणे, कर्तव्यनिष्ठतेने व कार्यतत्परतेने जबाबदाऱ्या पार पाडल्या.
त्यांच्या नेतृत्वाखाली विद्यापीठाच्या परीक्षा प्रक्रियेत शिस्तबद्ध व नियोजनबद्ध कामकाजाची अंमलबजावणी करण्यात आली. विविध अडचणी व आव्हानात्मक परिस्थितींना समर्थपणे तोंड देत त्यांनी परीक्षा सुरळीत पार पाडल्या. तसेच निकाल वेळेत जाहीर करून विद्यार्थ्यांमध्ये विश्वासार्हता निर्माण करण्यात त्यांनी महत्त्वाची भूमिका बजावली.
परीक्षा विभागासारख्या अत्यंत संवेदनशील व जबाबदारीच्या विभागात त्यांनी दाखविलेली कार्यक्षमता, दूरदृष्टी व निर्णयक्षमता विशेष प्रशंसनीय ठरली. त्यांच्या कार्यपद्धतीत शिस्त, पारदर्शकता आणि समयसूचकता यांचा उत्कृष्ट समन्वय दिसून आला.
याशिवाय, त्यांनी सहकारी व कर्मचाऱ्यांशी सदैव मनमिळावू व सहकार्याची भूमिका ठेवत सकारात्मक कार्यसंस्कृती निर्माण केली. त्यांच्या मार्गदर्शनामुळे प्रशासकीय प्रक्रियांमध्ये सुसूत्रता येऊन विभागाच्या कार्यक्षमतेत लक्षणीय वाढ झाली.
या सत्कार समारंभाला कर्मचारी संघटनेचे अध्यक्ष मनोज जाधव, सचिव सतीश पडोळे, सहसचिव शाहिना पठाण तसेच सदस्य प्रवीण पाहाणपटे, अविनाश सिडाम, माधुरी परसे, निलेश राठोड, विनायक गेडाम, कोमल मेश्राम, सुधीर पिंपळशेंडे, रामकृष्ण बोरकर यांच्यासह मोठ्या संख्येने कर्मचारी उपस्थित होते. कार्यक्रमाचे सूत्रसंचालन सतीश पडोळे यांनी केले.
यावेळी संघटनेच्या पदाधिकाऱ्यांनी डॉ. पोटदुखे यांना भावी आयुष्यासाठी उत्तम आरोग्य, यश आणि आनंदी भवितव्याच्या शुभेच्छा दिल्या. तसेच त्यांच्या कार्याचा आदर्श भविष्यातील प्रशासनासाठी प्रेरणादायी ठरेल, असा विश्वासही व्यक्त करण्यात आला.
