गडचिरोली, दि. १३ :
शेतीत अत्याधुनिक तंत्रज्ञानाचा वापर वाढवून उत्पादकता वृद्धिंगत करणे आणि ग्रामीण महिलांना आर्थिकदृष्ट्या सक्षम बनविणे या दुहेरी उद्देशाने जिल्हा परिषद गडचिरोलीने एक महत्त्वपूर्ण उपक्रम हाती घेतला आहे. केंद्र सरकारच्या ‘नमो ड्रोन दीदी’ योजनेच्या धर्तीवर तसेच राज्य कृषी विभागाच्या कृषी यांत्रिकीकरण उप-अभियानांतर्गत जिल्ह्यातील महिला बचत गट, शेतकरी गट व शेतकरी उत्पादक कंपन्यांना (FPOs) शेतीसाठी ड्रोन खरेदीसाठी आर्थिक अनुदान देण्यात येणार आहे.
योजनेची वैशिष्ट्ये व उद्दिष्टे…
🔹 महिला सक्षमीकरण:
महिला बचत गटांना ड्रोन तंत्रज्ञानाने सुसज्ज करून त्यांना अतिरिक्त उत्पन्नाचे साधन उपलब्ध करून देणे. यामुळे ग्रामीण महिलांची आर्थिक स्थिती मजबूत होईल आणि स्वावलंबनाला चालना मिळेल.
🔹 आधुनिक शेतीला प्रोत्साहन:
ड्रोनच्या साहाय्याने शेतीत नॅनो युरिया, डीएपी तसेच कीटकनाशकांची अचूक आणि कार्यक्षम फवारणी करता येईल. यामुळे वेळ, श्रम आणि खर्च या तिन्हींची बचत होईल.
🔹 सेवा पुरवठा मॉडेल:
महिला बचत गट आणि FPOs हे ड्रोन सेवा पुरवठादार म्हणून कार्य करतील. शेतकऱ्यांना भाड्याने ड्रोन उपलब्ध करून देऊन ते एक टिकाऊ व्यावसायिक मॉडेल उभारतील.
🔹 अनुदानाचा लाभ:
ड्रोन खरेदीसाठी एकूण किमतीच्या 65 टक्क्यांपर्यंत किंवा जास्तीत जास्त ₹5 लाख (जे कमी असेल तेवढे) अनुदान मिळणार आहे.
योजनेबाबत सविस्तर माहिती, मार्गदर्शक तत्त्वे आणि अर्जाचा नमुना जिल्हा परिषद गडचिरोलीच्या अधिकृत संकेतस्थळावर उपलब्ध आहे.
इच्छुक महिला बचत गट, शेतकरी गट आणि शेतकरी उत्पादक कंपन्यांनी अर्जाची अंतिम मुदत लक्षात घेऊन संबंधित कृषी विभागाशी संपर्क साधावा, असे आवाहन जिल्हा कृषी विकास अधिकारी श्री. किरण खोमणे यांनी केले आहे.
