गडचिरोली–आरमोरी मार्गावर मोठा अपघात; ट्रक क्रमांक MH-34 AB-1390 चे मोठे नुकसान, रेती वाहतुकीच्या टिप्परवर प्रश्नचिन्ह

गडचिरोली, दि. ७ जून :
गडचिरोली शहरापासून सुमारे १६ किलोमीटर अंतरावर असलेल्या काटली गावाजवळ रविवारी दुपारच्या सुमारास झालेल्या भीषण अपघाताने परिसरात खळबळ उडाली. गडचिरोली शहराकडून साखरेती घाटाच्या दिशेने भरधाव वेगाने जात असलेल्या टिप्परने आरमोरीकडून गडचिरोलीकडे येणाऱ्या मालवाहू ट्रकला समोरासमोर जोरदार धडक दिली. या अपघातात टिप्पर चालक गंभीर जखमी झाला असून त्याचा उजवा पाय तुटल्याची माहिती समोर आली आहे. तर ट्रक चालक किरकोळ जखमी होऊन थोडक्यात बचावला.

मिळालेल्या माहितीनुसार, एमएच-३४ एबी-१३९० क्रमांकाचा मालवाहू ट्रक आरमोरीकडून गडचिरोलीकडे आपल्या अधिकृत बाजूने येत होता. त्याचवेळी एमएच-४९ बीझेड-८८२२ क्रमांकाचा टिप्पर साखरेती घाटाच्या दिशेने जात असताना काटली गावाजवळ समोरून येणाऱ्या ट्रकवर आदळला. धडक इतकी भीषण होती की दोन्ही वाहनांच्या समोरील भागाचा अक्षरशः चुराडा झाला.

प्रत्यक्षदर्शींनी दिलेल्या माहितीनुसार, टिप्पर अतिशय वेगात व निष्काळजीपणे चालविला जात होता. अचानक वाहनावरील ताबा सुटल्याने तो समोरून येणाऱ्या ट्रकवर जाऊन आदळला. धडकेच्या तीव्रतेमुळे ट्रकचे समोरील चाक आपल्या जागेवरून निखळून मागील भागापर्यंत फेकले गेले. वाहनाचे मोठ्या प्रमाणात नुकसान झाले असून लाखो रुपयांची हानी झाल्याचा अंदाज व्यक्त केला जात आहे.

अपघातात जखमी झालेल्या टिप्पर चालकाचे नाव संदीप गणेश कटरे (वय ३७, रा. नागपूर) असे आहे. धडकेमुळे त्याचा उजवा पाय गंभीररीत्या जखमी होऊन तुटल्याची माहिती मिळाली आहे. तर ट्रक चालक रजनीकांत गुलाब कोटगले (वय ३०, रा. बल्लारपूर, ता. ब्रह्मपुरी) यांना किरकोळ दुखापत झाली आहे.

अपघातानंतर ट्रक चालक रजनीकांत कोटगले यांनी सांगितले की, ते आरमोरीकडून गडचिरोलीकडे आपल्या कायदेशीर मालवाहतुकीच्या कामासाठी येत असताना समोरून भरधाव वेगाने आलेल्या टिप्परने त्यांच्या वाहनाला जोरदार धडक दिली. धडक एवढी जबरदस्त होती की काही क्षणांसाठी काय घडले हेच समजले नाही.

घटनेची माहिती मिळताच पोलीस यंत्रणा तातडीने घटनास्थळी दाखल झाली. पोलिसांनी घटनास्थळाचा पंचनामा करून दोन्ही जखमी चालकांना उपचारासाठी जिल्हा सामान्य रुग्णालय, गडचिरोली येथे दाखल केले. जखमींवर उपचार सुरू असून टिप्पर चालकाची प्रकृती गंभीर असल्याचे सांगितले जात आहे.

स्थानिक नागरिकांनी दिलेल्या माहितीनुसार, संबंधित टिप्पर रेती वाहतुकीच्या कामात नियमितपणे वापरला जात असल्याचे दिसून येत होते. अपघाताच्या वेळी तो साखरा नदी घाटाच्या दिशेने जात होता, असा दावा काही नागरिकांनी केला आहे. मात्र या बाबतची अधिकृत पुष्टी अद्याप झालेली नाही. त्यामुळे पोलीस तपासानंतरच वस्तुस्थिती स्पष्ट होणार आहे.

या भीषण अपघातामुळे गडचिरोली–आरमोरी मार्गावरील वाहतूक काही काळ विस्कळीत झाली होती. पोलिसांनी तत्काळ परिस्थिती नियंत्रणात आणून वाहतूक सुरळीत केली. अपघाताचे नेमके कारण, वाहनांचा वेग, चालकांची निष्काळजीपणा आणि इतर तांत्रिक बाबींची सखोल चौकशी सुरू आहे.

छायाचित्रांमधून दिसली अपघाताची भीषणता

घटनास्थळावरील छायाचित्रांमध्ये टिप्पर आणि ट्रकच्या समोरील भागाचे मोठ्या प्रमाणात नुकसान झाल्याचे स्पष्ट दिसून येत आहे. धडकेची तीव्रता इतकी होती की टिप्पर चालक गंभीर जखमी झाला, तर ट्रकचे समोरील चाक तुटून वाहनापासून वेगळे झाले. या अपघाताने पुन्हा एकदा भरधाव आणि बेदरकार वाहनचालकांमुळे महामार्गांवर निर्माण होणाऱ्या धोक्याचा प्रश्न ऐरणीवर आला आहे.

स्थानिक नागरिकांनी या मार्गावर वेगमर्यादेचे काटेकोर पालन, वाहतूक नियमांची अंमलबजावणी आणि अवैध वाहतुकीवर कठोर कारवाई करण्याची मागणी प्रशासनाकडे केली आहे.